FANDOM


新不如舊文章

新不如舊


上星期車咗兩個老友去睇《荃家福錄壽》,咁啱同佢哋咁耐冇見,講起都應該有三、四年。今次特登早咗成粒鐘去車佢哋,順便同佢哋食餐飯敘敘舊!


佢哋兩公婆都係圈內人,平時好多後輩都當佢哋係契爺契媽,結咗婚成廿幾年,但兩個成日好似孖仔咁,羨煞傍人。呢晚我哋本來想去番以前成日去嘅鵝頸橋底炒蟹老字號「喜記」,點知佢喺謝斐道間老店巳經執咗,但就喺附近開咗成五、六間分店。


記得成十年前第一次去「喜記」,嗰時老細廖喜成日親自出嚟招呼我哋,就連佢哋生得美若天仙嘅女都出嚟幫手,我哋個個都當佢係妹妹,次次落去食嘢都好似返咗屋企咁,好有家庭feel!到咗今次去其中一間分店,問番啲伙記先知,廖生個女結咗婚生埋B,而廖生自己都完全退休,一心留喺屋企湊孫享受家庭樂,而家啲生意都係交俾啲仔同伙記打理。

新不如舊相

今次「舊」地重遊。當然要食番啲招牌菜:避風塘炒蟹、豉椒炒蜆同椒鹽鮮魷。唔知係咪分店開得多,師傳亦太多,味道好似有啲新不如舊,唔知點形容但好似冇咗某啲風味。 好彩,同兩個老友邊食邊吹水,講番大家近排嘅趣事,所以食物味道巳經唔再係最重要,「相聚一刻」先係值得回味!


唔驚唔覺,講講下又係時候開工,咁啱呢pair「金牌夫婦」有個朋友去唔倒睇福䘵壽嘅騷,佢哋又同我傾到興高采烈,於是我哋就三人行一齊去咗捧汪明荃、李思捷、王祖藍同阮兆祥場。最意想不到嘅係,三個福䘵壽嘅表現令人有意外驚喜,尤其係祥仔講佢同自己老竇嘅感人故事嗰part,搞到我男人老狗都流馬尿!而汪阿姐嘅「驚」人歌喉同豔舞,就真係‧‧‧‧‧‧不敢恭維囉!

Download original scan 下載原圖